يالله يا رب الملا يا مجيبها
تعلم ظواهرها وتعلم بغيبها
أنت العظيم اللى لعفوه وطاعته
نرجي وباقي الخلق ما نرتجيبها
يالله توفقنا إلى الخير والهدى
وسنة نبيك دلنا نقتديبها
ويالله تبعدنا عن الغي والزلل
وعن خطوةٍ ما ربح من يختطيبها
وعن مجلس تاليه غيبه ونمّه
وسوالف غثا بعض الخبول يحكيبها
ولا يغبن الرجال مثل الهتايل
إذا جيت تنصحها تردى نصيبها
تعاديك وتقوّلك ما لم تقوله
وتصنع هروجٍ للملا تفتريبها
رخومٍ على الذلة تردى مسيرها
تخيب وتخيّب واحدٍ يعتزيبها
إذا هنتها تخضع مع من يهينها
ومن يحترمها كيف يصبح حريبها؟
طبوع اللئام تجازي الطيب بالردى
وتنكر معاريف النشاما وطيبها
طبوع اللئام الخزي والقبح والخنا
وتقلب عداوتها لمن يعتنيبها
وتجحد وتنكر ماضي قد فعلته
وعلاتها يحتار فيها طبيبها