إذا صار للمعنى جزالة وفن وذوق
وصارت بيوت أهل المعاني على القمة
وكلٍّ غدا يفتل وينقض ويرمي فوق
وعن هافي الأهداف يعليه ويضمه
وقام يتسامى ويتخير من المنطوق
ولا يتبع اللي يأخذ الدون ويخمه
وجات المثايل مثل درٍّ حلب من نوق
بوقت الربيع تفلي بوادي الرمة
تخيرت من زين المثل ما يوفي ويلوق
ولبست قوافيها غطا الراس والعمّة
تجي مثل تمر النخل وقت الجني بعذوق
على النظم والقلطة وعرضة وبالدمة
وهذا الخبر مني ومن مصدره موثوق
ما هو من مصادر ناقل الزور والنمة
يجيش الصدر مثل المخايل تجي بحقوق
إذا جاد ربي تجلي الهم والغمّة
شبيه الثعول الغرّ فيها تلوح بروق
سحابة ونوه خمس ساعات ملتمة
يروي كبودٍ صابها من ظماها فتوق
ويمسي الغدير اللي نشف ناضحٍ جمه