كان لك شيّ بحياتي قربّي مني خذيه
ما أبيه ما دام قلبك ناوي لقلبي قطاع
دوّري غيري متيّم ولا لقيتي بشّريه
دامه حبّك والله يبشر بالمتاهه والضياع
عن حنيني وإشتياقي.. عن غرامي خبّريه
وكيف كنتي الرعيّه وكان لك هالقلب راع
وعلّميه بكل وعود الحب الأول علّميه
وكيف قلبي يوم حب قلبك تمايل للوداع
وحذّريه إن قلبك أسود والحقد مولود فيه
يرتوي من هالخطايا ويردّها بمليون صاع
ولا حكيتي له وشكيتي لا تقولي ما أبيه
لأن حبّي لك سفينه وكان قلبك له شراع
بس إنتي ما تبين الحب الأبيض النزيه
ودّك بحبٍّ يبكّي عينك السودا الوساع
ودّك بواحد أناني لو يزعلّكِ تجيه
ولو بيآمر بالخطايا قلتي أمرك لي مطاع
وش علامك يا بنيّه كل حبٍّ تبتديه
تلعبي فيه تتسلّي كل دقيقه وكل ساع
سهّل الله لك دروبك بس شي واعرفيه
إني شخصٍ ما بعمره حب خلّه ثم باع