طاوعينى قبل مايسبقك
قلبى بقرار يجرح شعورك
ويكون شرارة لاشتعال
مابين عنادى وبين غرورك
انا لسة باقى على الوداد
ولسة شايل ذكرياتى
ماتخلنيش انسي اللى فات
واطويه ف صفحة من حياتى
ان كنتى فاكرة ان الفؤاد
اللى انشغل بك هان عليا
ارميه واسيبه ف سكتك
ينداس عليه قدام عنيا
واجيك مطاطى ومنحنى
ودموعى تسبق لاعتذار
واقول ياريتك تصفحى
اهون عليا الانتحار
دا المستحيل انى اجيلك
واعتذر مهما يكون
لو حتى كان عمرى التمن
اهون عليا انه يهون
ولا سيبش قلبى ف سكتك
ينداس عليه من حين لحين
وانا اللى ببداء بالوفا
واللهفة والشوق والحنين
مين اللى قال ان الغرام
لازم يكون هجر وظنون
وغيرة تحرق حبنا
وتسرق النوم م العيون
لو كان دا راح يبقى الغرام
اومال هيبقى الكره ايه
وازاى بتشتاقى للحبيب
ويهون عليكى تعذبيه
انا بعتذر على كل كلمة حب
زلقت من لسانى
يازهرة كانت دنيتى
ومالكة احساسى وكيانى