ياعندليب انت ليه
مفارق الناحية
كل البلابل تغنى
وانت م المجاريح
غنيت باسمك ياصاحبى
والناس كانت صاحية
قالو يغور الطرب
لو مش طرب بصحيح
طاقة السما للفجر صاحية
بتلم ف الدعوات
تبدر ف رزق الخلايق
وانا رزقى ليه شاحح
لو كان ضمير الحدادى
وسط الطيور كان مات
ازاى حمامى هاينسي
الغدر ويسامح
ياعندليب ع الشجر
ورق الشجر دبلان
وانا جزعى مايل
وشد فروعى ع الاخر
قلبى الضعيف اتشرخ
ياريته طاب او لان
على دكة الصبر قاعد
وطريقى بتاخر
حلمى الصغير ف وسط
الزحمة تاه منى
ماسك فى ديل الدنيا
يلف بالمشوار
معرفش ليه الخلايق
بالظلم تهمنى
وانا لسة داقق ف نعش
الدنيا ميت مسمار
كل الدفاتر مضيتها
وبحسب الفواتير
ودموعى سجلتها
فى اخر الصفحة
مالقتش واحد نصفنى
ويفتكرى الخير
مع ان واقف
ف اخر صف للفرحة
مستنى دقة نغم
من قلبى طالعة لى
تعلن حضور الفرح
وانا هحضر الزفة
مستنى مدت ايدين
تخدنى للعالى
علشان اشوف بسمتى
بتحرك الشفة
كل الوشوش اللى واقفة
متقلقة م الخوف
والياس خيم عليهم
ولافيش بصيص للنور
كل اما بفتح ف طاقة
يدهسنى جيش الظروف
والهم ينشر غباره
ويعلى مليون. سور
اشبك ف طرف الامل
تذكرة لبكرة
يخدنى قطر الليالى
ويمر على الايام
وكل ساعة يفوت
محطة للذكرى
عشمان يكون الفرح
لسة جاى قدام