لا تمنعين الخيل .. يا(ماويّه)
خليّها تعطي جهدها ميدانه
في ركضها تجسيد للحريّه
في عصر زاد اسياده.. وكهّانه
من ركضها تكفي صور رمزيّه
حلم السجين ..او بعض من عنوانه
إلى ركضت ، ثم ركضت .. مقريه..
أبعادها .. بعيونه و باشجانه
يا فارسه.. والقابنا وهميّه
واكثر امانينا بليّا خانه
والشمس فوق ارواحنا محميَّه
لكن روحي بعضها بردانه!
خلّي بقلبك لو بَعَض ماويّه
ما يفتح (الأسطبل) من تحنانه!
لو عن سياجه ما رفعت يْديَّه
كان احترق شريان من نيرانه
حورية اللفتات ، يا شاميه
نجدية الضافي على مرجانه
انا هنا .. يالنسمه العطريه
هايم ، يمارس للشجون ادمانه
شاعر تقارب من طَرَف محميّه
ومدري فرح والاَّ انجرح وجدانه
واللي بقلبه قهْر مدري حيَّه
دايم من احلامه وهي غضبانه!
مات اكثره ، لكن روحه حيّه
بها من البحْر ،الغضب/طوفانه
قضيّته لو إنها شخصيّه
ما صار حزن الناس صدر احزانه
ضايق فضا بافكاره الرجعيّه
في راي من يفرض عليه ايمانه
ادري .. بهذا الكون يوجد زيّه
لكن ما هو زيّه بسجن لسانه!
لو ما تيسَّر من بَعَض حنيّه
ما شال ذاك السجن دون اعوانه!
وانتي هناك ..النظره الجديّه
والمستبّده بالحَوَر و إنسانه
يالجوهر اللي يثبت الحوريه
في مظهر إنسيّه على برهانه
شكّي يساورني شكل وهميَّه
والعلم يشكون الهوى جيرانه!
تشيَّعت لك نجل يا سنيّه
للسحر .. والاّ العقل جاك إذعانه!
وإن كان قاربني خطر جنيّه
عساه للشاعر قبل شيطانه!
من لاح فستانك على مخفيّه
من جاد بالحشمه بحسب إمكانه!
سريالي الرسمات.. مِليِه غَيّه
المحتوي للفتنه الريّانه
شوفي ، هنا.. سريالي حزن ونيّه
يشكر لهالفستان فضل احسانه!
ما بان من ماسيِّك بكيديّه
الاّ توّرط فكره بريحانه!
و يلوح فستانك ، بهالكيفيّه
وردٍ تهفهف من غَنَج غزلانه
تمشين به .. يقبل ضحى وسميَّه
خمسة سنين الطهر بين اخوانه!
تمشين.. تدخل حصَّة الفنيَّه
كراسة النفل .. وطفل ، والوانه
تمشين .. تمطر بالفؤاد بْنيَّه
على شكل غيمة عطر ولهانه
إمشي بَعَد .. لو خطوتين شويّه
ويغادر الشاعر سجن حرمانه
لو ما وقفتي ..غايته معنيَّه
يمكن نده لك من غلا : يافلانه
لو تطلقين الخيل يا ماوية..
يمكن يطير القيد مع شيهانه!