البارحه يوم اهْجعت كلَ الانظارْ
عَيَّت عيوني بالكرى لا تغَضّيه
أبدع بيوتٍ من ضميري لها كار
اتْخُصّ شيخٍ بَيّناتٍ مواريه
أبو خليفه زايدٍ نَسْل الاَحرار
ريف الضعيف ولي لجا به ينَجِّيه
أهْوَ أبونا مْرَبِّي كْبار وصْغار
وعينه وَرانا وكل محتاج مِغْنِيه
الله يدومه دايم الدوم في الدار
كالغيث لي مِن طاح في القاع يَحْيِيه
قامت ترّحب به الارِض قبِل لَبْشار
والله عليمِ انّا نحبّه ونَغْلِيه
ما جابت الخفرات مثله ولا صار
لطيف ما هو فَظّ باللي يصافيه
واللي يضدّه يَلْحِقَه سَوّ الاَمرار
ما يهتِني بالنوم ضِدّ لمْعاديه
عساه في دنياه ما يْشوف الاّكدار
يعيش في صِحّه ويَبْذي معاديه
أبقاه والي العرش علَّام الاَسرار
اللي خلق الاُمّه والاَرزاق بْيديه
أمّر بمشروع المدن وِسطْ الاَبرار
ومكاينٍ للماء إليها توَدّيه
ومكاينٍ للكهربا ليل وِنْهار
وكلُّه لِعينا الشعب كَمّل معانيه
ورَسْتات ما هي كَدْش يا غير مِ القار
ينفِق عليها مال ما حدّ يَقْصِيه
من قام بالعمران خَذها بالاَدوار
وله حكمةٍ من والي العرش معْطِيه
داره عَمَرها بحكمةٍ وِبْتِفِكَّار
له شور صعبٍ ما يبا من يجَدّيه
سَنّع ارقوقٍ يَدْفِقِنْ مثل الاَنهار
وتْراكتُوراتٍ كلّ عَذْبٍ تساويه
ومستشفياتٍ للشعب بر وَابحار
ومْدارسٍ للي بغَى العلم تعطيه
وَامَّن بِداةٍ ساكنينٍ بالاَبرار
وحقّ العدو سنّع رجال تكَفّيه
في حكم بوسلطان يرعون الاَقفار
مستامنينٍ يعل ربّي يخَلّيه
ومشَّى معاشاتٍ لاَطفالٍ صْغَار
ومن جاه عانى ما نَهَيْ بيضٍ ايديه
إذا عَطَى ما يعطي مِيَّه ودينار
يعطي عطايا ما تقايس لْمَعطيه
هذا ونرجي من عطاياه لِكْبَار
ومن ظَنّ فيه بخير ما خاب راجيه
يا بوخليفه يا رَجا كلّ محتار
إنتَ رجانا ومنّك الخير نرجيه
في خايعٍ عَلّه من السيل مَطَّار
تلقى الحباري رِتَّعٍ في روابيه
وَلّم بدوره للهدد كل صقّار
بْحُرّ أدنى للقَنَص من مخابيه
خايَل وبرَّقَ يبغيِ يْشوف لي صار
اللي هرب واللي خَمَر في مَداحيه
شَيٍ خِمَرْ منهن وشيٍ بعَد طار
ولي طار ما حَصّل مكانٍ ينجّيه
الريش خِلّى وسط لَبْطاح نَثَّار
فعل اَدهمٍ موت الحباري بْكَفّيه
ما حلّ مات وما هرب لِحْقه اطيار
يْجيك مثل الشلْع مِ الجَوّ مِرميه
امْوَجّبات طْيورهم قبل الاَفطار
وكلٍ يِبا الناموس لي مَرّ طاريه
ولا بد هذا غير خيراتٍ اكْثار
من فعل شيخٍ كاملاتٍ معانيه
تمَّت وصلى الله على نور الاَنوار
محمد الشافع لطايع ومعصيه