يا الله أنَا طالبْك يا مرْزِق الحَيّ
متكفّلٍ بارزاقهم وِانت والي
خلقت آدم من قَبِل وَهُو ما شَيّ
وِجْعلت له ذريّةٍ في التّوالي
حدٍ مِطيع وْحَدّ مِ الخلق معْصِيّ
ومِتْلَاه خلقك كلّهم للزوالي
يا الله بغفرانك يلي قام يَعْطيّ
بَامْرَك كتابٍ باليمين وْشِمالي
من عمَّر الدنيا رحل ما مَعَهْ شَيَ
غير العمل للَّه كَفّنه خوالي
يا ويلكم يا رايحينٍ مع الغَيّ
غرّتكم الدّنيا جمع الآموالي
لو كان فيها خير ما حام الطَيّ
أفْنَى الحلال وسِمْعةٍ لهْ تِقالي
وشدّاد فيها راكضٍ قَصْر يَبْنِيّ
ومن عقب بنيانه طِمَتْه الرمالي
حظيظ فيها اللي كسب مِ العمل شيّ
يرضي به المولى نهار السوالي
من يوم يصمت والاعضا بسّ تحكي
يتكلمون بْما فعل من عَمالي
يوم السما مثل القراطيس تِطْويّ
والناس عِريٍ لا لِبس لا ظلالي
في موقعٍ لا أبّ ينفع ولا حَيّ
وَلَا ولَد ولا صديقٍ موالي
يا غير من قدّم له أعمال ترضيّ
الواحد المعبود ربّ الجلالي
تغفر ذنوبي وانت علّام ما خْفِيّ
يا حيّ يا قيّوم تقْبَل سُوالي
استغفر الله واطلبه كل ما اسْهيّ
يغفر ذنوبٍ مبطياتٍ سمالي
يغَفْر زلَّاتي وهو علَّام ما انوِيّ
وإلّا انا ما ادري وشِ إهْيّ عَمالي
وقتٍ غدا ما هوب مَيّت ولا حيّ
الله يكفي شرّ باقي الليالي
تْغيَّرَتْ الآلباس والدين مَنْسِيّ
قليل ياللي لْطاعة الله موالي
ومن عقب ذا طالبك من فضلك اِلْمَيّ
مْن السّحاب اللي مزونه تْقالي
بخْواهرٍ لا فيه بردٍ ولا عَيّ
يزْغَاه كوسٍ عقب شرتا شمالي
تْشوف برقه لي بدا كنّه ضْوَيّ
وِشْوامخه شروات لون الجبالي
وصوت رْعَدَه يَسْهِرك لو كنت مغضِيّ
يسقى مفالي مْعَبّسات الشمالي
ويعيضنا في الوقت لي قد مضى بْزِيّ
زِيّ العشوب اللي بِوَصْف الزوالي
عْطيّتك ما تنقصَيى يوم تَعْطِيّ
يا مْقَسّم الأرزاق منْك الافضالي
يسقي من الظنّه جنوبٍ الى طْوَيّ
وعسَى انّ جوده ينذكِر في الرمالي
وعسَى ان جوده ينذكر وين انا ابْغِيّ
في ديرةٍ ماها سُوات الزلالي
وتشوف سيله في الرمل هوب في صْفِيّ
غَبّ امْطَرَه شِرب البدو مْن الهيالي
ما وَرّدوهن للطُوي قَدْهن جْزِيّ
وقت الصفاري في قصير وْطوالي
قد وَلَّن وعيالهن توّ تدريّ
شيٍ مصافيرٍ وشيٍ مَتالي
ما شِمّلت يا غير من فوقها شْهَيّ
مثل البِنِيّ لي زيِّنت بالدلالي
تِحْلَب لهَشَال الخَلا يوم يضْوِيّ
كبار الجماهي ضافيات السّبالي
تسمع وِحيف سْمومها كالإفاعيَ
ما قِيّدت وقت الحَلَبْ بالحبالي
يا زينهن في خايعٍ عَلّه المَيّ
شيٍ بُروك وشَيٍ منهن فُوالي
ومن فضْل ربّي ما افْقِدَن مٍ العشب شَيّ
شيٍ جديد وشَيّ مِنّه سمالي
وصوت الفحل طرف العشاير يدَوِّيّ
دَوْي الرعد في مرزمات الخيالي
يا زين ذاك اليوم عَساه ياتِيّ
وننسى الذي قد فات الآمحالي
عساك تقبَل دعوتي وانتْ تدرِيّ
بِمّا جرى للخَلْق يا خير والي
يا خيّرٍ مِنْ سَاْلَتَه الخلق يعطيّ
عطيّتَك ما تنقَصَى بالكمالي
واختامها صلّوا على من دَفِن حَيّ
على النبي المختار صَحبه والآلي