اليوم لا صفو بال ولا طمأنينة
أعوذ بالله من نفسي ووسواسي
يقلقني المستريح ليا غفت عينه
ما يطرد نعاسه اللي يطرد نعاسي
ويغيظني صمتي اللي حد سكينه
يحول بيني وبين وجيه جلاسي
أودع الليل « كني » من محبينه
واستقبل الصبح كني لاجئ سياسي
وإذا سرى من حدود الليل ثلثينه
هب الهواء من شمال وذكر الناسي
شرايد الذكريات: الزينة الشينة
تمد عمر سهري وتجدد عماسي
والادمي خيبة ظنونه من يدينه
نجم هوى في علو النايد الراسي
استغرب الكائن المخلوق من طينه
لا صار طبعه مثل طبع الحجر قاسي
والحمد لله.. على نصره وتمكينه
ما للبشر فضل في شكلي وف لباسي
من تجربة عمر في الكون وميادينه
لا زلت اشوف المبادي ركن أساسي
محبة اللي: فداه العمر وسنينه
ادرا عليها مثل ما ادرا على ساسي
ل العيش والملح واللي بيني وبينه
إن ما رجع خل لا يرجع لي مواسي
تغير (الوقت).. واختلت موازينه
حتى الصباحات صارت مثل الأماسي
يا وجه أعد روحي من مساجينه
إلى متى والرموش السود حراسي
فتنتني فتنة القابض على دينه
أنا بليت ب هواك وطحت متواسي
ما قد ضميت لعيون ما لها عينة
"إلا وجدت خيالًا منك في الكاس"
محبوبة الغيم.. والورد وبساتينه
من غير طيفك يشاركني بهوجاسي
العام عذرك معك من غير تبدينه
واليوم عذرك ثقيل أثقل من أنفاسي
عطيتك اكثر من اللي تستحقينه
وأخذت عدة جروح بوقت قياسي
أشيل (هم) عجزتي لا تشيلينه
حتى وأنا شايل الدنيا على راسي
أقسى الخطايا خطاك اللي تعيدينه
وأعلي درجات عز النفس مقياسي
ليتك تداركتي اللي صار في حينه
قدام لا ياصل الموضوع لإحساسي