على درب الهوى ضاعت خطاي وضاعت الآمال
تركت العمر في دربٍ غريبٍ منطوى فيها
سهرْت الليل أكتب من جروحي قصةً وأقوال
وأروي للزمن وجدي وأحزاني وأغنيها
سكنتُ الجرحَ، والأنفاسُ تشهدُ حزنَها والبال
وأشواقي تنادي من بقايا الروح ماضيها
فقدتك فقد ما يقدر يغيّره الزمن لو طال
ولو ضاقت دروب العمر، يفتحها تلاقيها
أنا ما هنت، ولا بنسى، ولا قلبي غدا محتال
ولا غابت ملامحك عن عيوني في لياليها
تعال وخلني ألقاك، يا حزنٍ سكن وأغتال
تعال وخلني اسقي ظما روحي وأرويها
فقدتك، بس أنا مؤمن بلقياك ولو محال
مصير الروح تجمعنا، بيد الله أراضيها
فقدتك يا بدايات الوله وابتسام الحال
يا أعذب من دخل قلبي وأنفاسي سكن فيها
فقدتك والظما يجهد عزومي والدروب طوال
سرابك يجرح أحلام اللقاء ويخون أمانيها
حبيبي لاح بارق ذكرياتك في سما الآمال
وأنا ارجي بالعمر ليلة سناك يمرني فيها
بعد عتم الليالي والجروح وغربة الترحال
أمرك بالمدى دار اندفن حلمي بأراضيها
أنا ل اليوم أزور اعذب مدينه وانشد الأطلال
عن أحداث السنين اللي هنا العمر ب لياليها
أنا ما زلت أرتجّي طيفك الغالي مع الآمال
وأحطك في دعاء الليل وأبكي من لياليها
تعبت أجاري ألحان الحنين بروعة الموّال
على الألحان أغنيها.. وفي الأبيات أبكيها
"إلين اليوم"، "أجي لك شوق" اغني والأمل موّال
وش اخباري؟ " على حطة يدك مازلت أغنيها
"دخيل الله، وبعد الله دخيلك" لا تلوم البال
"إلين اليوم" ذكرى تنثر الذكرى ب أغانيها
الين اليوم أنا أتخيّل لقانا كيف إذا الله قال
إذا الله قال تلقاني.. ديارٍ وأنت راعيها
"مصير الحي يتلاقى" ولو عمر المفارق طال
ولو مرّ "ألف عمر" أحلامنا ماني ب ناسيها
حبيبي والبشر صاروا بصبري يضربون أمثال
ثلاث سنين وطيوفك تناديني وأناديها
أشوفك في صباحات الأماني والوله يختال
وأشوفك في غروبِ ياخذ الشمس من أياديها
أشوفك من هنا لين الدروب تجود لي ب وصال
وأشوفك بالديار اللي من الفرقى وأنا آجيها
كتبتك بالقصيد اللي بيبقى خالدٍ ل أجيال
قصايد من قراها.. ما قدر ينسى معانيها".