يا غرام ما يجي إلا على طيب احتكامك

يا غَرامٍ ما يجي إلا على طيب احتكامك

ما يجي إلا من إحساسٍ نبت منها نسيمه

من عرفتك والسهر يرقى على جفنٍ غرامك

والسكون اللي بصدري صار يرقص في غنيمة

كل نبضٍ في وريدي صار يكتب في هيامك

وكل حرفٍ في قصيدي صار يطلب لك كليمه

كِل كلمة من لسان الشمْت ما هزّت مقامك

دامك اللي بين ضلعيني على عرشك مقيمه

أحسب إنّ الخيزرانة في يدْي واثره قوامك

لا تثنّى قلت يمكنْه انخلق من بطن غيمه

أتلذذ في حرُوبك حُب، وارغب في سلامك

والصحيح إن السلامة خير ووصالك غنيمة

الحيا في وجهك البدري، وموتي من كلامك

يوم قلتي لي نوايانا من الباطل سليمه

كل ما مالت ضلوعك من غَيا، عيّا حزامك

لا تمايلتي، تمايل كل نفسٍ مستقيمه

ما عشقت إلا عيونك كثر ما تَرسل سهامك

في فواد اللي مشرّع لك من اللهفة صميمه

ولا غبَطت مْن النسيج إلا خيوطٍ في لِثامك

ليه تاقف بيني وبينك وأنا نفسي محيمه؟

اسلبيني ما معي سلطه على فرض احترامك

اخذي اللي تستحقينه عطا، ما هو ظليمه

مستعد اقطف لك النجمة واخليها زمامك

شاعرك حتى الفضاء من نشوته يقدر يهيمه

وإن غفت كل القصايد، ما غفا فيني غرامك

دامني حيٍّ على نبضك،وفيك الروح ديمه

لو تخلّي كل هالعالم وتترك لي ملامك

ما تغيّر في ولائي لك،ولا قلّت عزيمه

أنت ختم الشعر، وأول بيت في صدر اهتمامك

وانتهى شعري وأنا ما قلت إلا نصف قيمه