يا زين.. ذيك الملامح والهدوء العذب
يا فارقه في وصوفك.. والغلا السامي
يمر طيفك.. وينبت في طريقي عشب
ويطل زولك.. وأشوفه أجمل أحلامي
يا حي حلو القبول.. اللي بقلبي لعب
سميت باسم الله.. وعضيت ب إبهامي
أغليك.. وأغلي كلامك والحياء والأدب
ومنك ترا.. كل شيء.. يجذب هيامي
سولف.. ترا السالفة منك.. بروحي تهب
تشفي غليل الزمن.. وتبدد أوهامي
لو كان حكيك "ملامة".. لمت فيك السبب
وأنا بحبك.. نسيت اللوم.. وآلامي
أشوف فيك الحياة.. اللي تنسي التعب
وأشوف فيك الملاذ.. لخايف أعوامي
وأشوفك الديم. لليابس بعرق القلب
وأشوفني ارتويك.. ونوب بك ظامي!
ما للهوى في عيوني.. غير دريك درب
لو كثرت وجيه خلق الله - قدامي
ما للنظر في عيونك.. غير جفن وهدب
لكنها.. شمس أشعاري.. وإلهامي
أغليك من قلب.. ما والله لغيرك يحب
ويغليك دمي ولحمي.. وقاسي عظامي
تعال وأسكن ورا عوج الحنايا.. الحدب
يا أغلى من العمر.. وأقرب مني لأيامي
خذني لباكر. وخذني لآخرك.. وارتكب
فيني ما يحلو لعين.. رمشها إعدامي!