ما عاد فيني شي حيٍّ غير طيفك مرتقب
وما عاد فيني غير صوتك، لا نطق لي أو حضر
أحسّني فيني، ولا فيني، كأني من ذهب
ذاب الغلا فيني، ولا باقي معي غير الأثر
عاد الشتاء، واقفيت - لا داعي فراق ولا سبب
وأنا انتظرته هالشتاء، لجل أملي الذكرى صور
الشوق ما ظني يخلي قلبي بحاجة حطب
ناره على صدري تهب الجرح وتشبه جمر
علمتني بإن.. هذي أول مره بعمري أحب
يا أول فراق أوادعه واحس في صدري قهر
سلم سلام الله ترد الروح ويطيح العتب
الله لو تدري رغم ما صار جياتك عذر
لي قلب من دم ولحم من قال لك قلبي خشب
قلبي عجزّ يستوعب الفرقا، ولو قلبك قَدر
ما غير صوتك صوت تمليني سواليفه طرب
احفظ كلامه لا شعورياً مثل حفظ الشعر
يا وجهك اللي يشبه القمرا وهي بين السحب
يا كم خذا فيني وأنا أتامل تفاصيله أجر
أتصوره والغيم يبرق والهوى عطرك يهب
تحت المطر وأقول لك احبك اكثر مْ المطر
أدل دربك واعرفه وتردني عزه عرب
يا كثر ما هي وسوست لي لهفتي صوبك أمر
الشوق يطلبني وارد الشوق وأرد الطلب
أخاف أجيلك عاني دروبك وأنا مالي قدر
اشتقت لين الشوق علقّ ذكرياتك بالهدب
ما عاد هالصورة تصبرني ولا ذاك العطر..
قدرك إذا ربي كتب ترجع وإذا الله ما كتب
ثابت.. تأكد لو تدور الأرض ما عاضك بشر
غيرك يجي يروح ما هز الشعور ولا عجب
ما هو بمثلك من يعرفك ساعه يحبك عمر.
إن غبت، ما غابت ملامحك، ولا قلبي شطب
تبقى بقلبي مثل ما تبقى النجوم مع القمر