الحبر ريشة للورق تعزف على أوتار الحروف
واللحن متناغم معا حرف الهجاء الأبجدي
وساعة على المكتب تدق وكتاب وجدار الرفوف
والمكتب الهادي حزين والفكر جامح ويعدي
صرت أجمع أوراقي وأقول يا شعر وينك ما تشوف
ما ينقص المشهد سواك للحين ماشفت سعدي
لك حق عندي والعذر أحيان تخذله الظروف
ولي حق عندك يا شعر انك تجي في موعدي
أحيان اعشق وحدتي وأحيان أدور للضيوف
واحيان تايه ماعرف من وين بس بنبتدي
دمعات حبرك يا قلم في وسط أوراقي تطوف
لاكفكف دموعك ورق واخنقك دايم في يدي
أفكار تشعلني حكي وأفكار تربك هالكفوف
وما بينهم عابر سبيل والدرب موحش سرمدي
الشعر دايم مختلف خصاً اذا فكرك شغوف
أعامله مثل الابو ويطيعني مثل ولدي
وبنات فكري حاضره وتبرني من دون خوف
هذبتها صدر وعجز وقدمتها مثل الهدي
جفت صحف بوحي عطش وارتفعت أقلامي سيوف
وش عاد باقي لي معي غيري أنا وقلّ جهدي