أنا الكتاب..
أنا لبيت العقل.. باب
أنا اللي بكشف للحجاب
أنا الشيطان والأنبيا
أنا الإيمان والمعصيه
أنا الطريق وسط الضباب
أنا الكتاب
أنا الكتاب مهما أختلف
أنا اليهودي
والمسيحي
والسلف
أنا المعارك والصراع
أنا الخضوع والأنصياع
أنا الهدى
وأنا الضياع
أنا الهدايه
أنا الهدايه لكل عاقل
وحل ألغاز المسائل
وقت الظلام أنا الشروق
وقت الجدال أنا الفاروق
أنا الجدال
أنا الشذوذ والأعتدال
أنا المدن والأوديه
وأنا الصخور فوق الجبال
أنا الجمال..
أنا الحكاوي والغنى
للي أتفقر واللي أتغنا
لساك بتسأل مين أنا
أنا للمسائل ردها
أنا كل حاجه وضدها
أنا الفنون وأنا الأداب
أنا المديح وأنا السباب
أنا المداوي للجروح...
وأنا السيوف فوق الرقاب
أنا التاريخ
وأنا الحساب
أنا الكتاب
أنا النجاح وانا الفشل
وانا التاريخ اللي اتنشل
أنا الكتاب
أنا الكتاب... أنا الزعيم
أنا القبيح وأنا الوسيم
أنا اللي بجنح بيك ساعات
وأنا الصراط المستقيم
أنا الكتاب
أنا الزعيم
طه وحكيم
وعشان ماتكمل قافيتي
هاتولي كلمه أخرها ميم