أنا شاعر..مغلوب على أمري
كلمتي كانت.. طبلي وزمري
كل طريقه وليها مشايخ..
وأنا اشعاري دي كاسي وخمري
أنا في قصايدي.. شيخ درويش
مجذوب.. وبحب التطنيش
وف أزجالي..متعرفنيش
مسطول.. ضارب طن حشيش
أصل أنا شاعر.. وأسمي غياب
سبع يا عيني.. مليش أنياب
أصل الغيبه.. دي تبقى نميمه
بس وربي.. النيه سليمه
بس بلدنا زي السيما..
هما بيهتكوا عرض.. حليمه
وأنت هتلبس.. يابني جريمه
عايز شاهد
مليووون شاهد
يشهد إنك.. كلب وواطي
كده أو كده..لازم هتطاطي
أصل أنا شاعر.. وأسمي غياب
بس أنا حاضر..
واقع مر.. وعيشه هباب
سبع يا عيني.. مليش أنياب
أصل أنا شاعر..
شاعر.. بهمومها وبلاويها
شاعر.. بالظلم اللي ماليها
شاعر.. بالطفح ف مجاريها
شاعر.. بالفقر ف حواريها
أنا مش شاعر..
مش شاعر.. بالعدل في بلدي
مش شاعر.. بكرامة يا ولدي
أصل أنا شاعر.. وأسمي غياب
سبع يا عيني.. مليش أنياب
أنا شاعر..مغلوب على أمري
كلمتي كانت.. طبلي وزمري
كل طريقه وليها مشايخ..
وأنا اشعاري دي كاسي وخمري