أنا المصري بأفكاري
وعشقي لأرضي ودياري
حزين وحبي لبلادي
سبب أحزاني ومراري
أنا إبداعي عنواني
وأنا الصانع وأنا الباني
أنا اللي بنيت حضارة ومجد
تسمع قاصي أو داني
أنا المصري بأفكاري
وعشقي لأرضي ودياري
أنا الأقصر أنا طيبة
أنا الأخلاق أنا الطيبة
أنا الطهر أنا العفة
لساني ما يوم نطق عيبة
أنا المصري بأفكاري
وعشقي لأرضي ودياري
أنا أكتوبر أنا حطين
ولوني من سمار الطين
أنا دمي روى أرضك
وهفديكي بضي العين
أنا المصري بأفكاري
وعشقي لأرضي ودياري
أنا أحمس أنا ناصر
ودايمًا للضعيف ناصر
ألاقي فجأة نفسي جبان
كأني طفل أو قاصر
أنا المصري بأفكاري
وعشقي لأرضي ودياري
أنا الملعون بحكامي
محدش حس بآلامي
مفيش حاكم بنصفني
وسرقوا حتى أحلامي
أنا المصري بأفكاري
وعشقي لأرضي ودياري
أنا القاتل وأنا المقتول
بيدي شهرت سيف مسلول
على إخواني وخلاني
عبيط وعقلي كان مشلول
أنا المصري بأفكاري
وعشقي لأرضي ودياري
أنا الثائر على الطغيان
على كل اللي باع أو خان
على كل اللي بيفسر
هدوئي إني لسه جبان
أنا المصري بأفكاري
وعشقي لأرضي ودياري
حزين وحبي لبلادي
سبب أحزاني ومراري