خدلك ساتر
واقرا جوابي
أنا أرهابي
قبل ما تبداء بقي في عتابي
أخبط بابي
أسأل عني وأقرا جوابي
خدلك ساتر
أنا أرهابي
أرجع بالتفكير لزمان
مش لشبابك
أرجع يابني حبه كمان
كنت زميلك انا في دراسه
فاتحين مع بعض.الكراسه
ياما لعبنا وياما جرينا
عن اهالينا ياما دارينا
امك أمي
وأبوك بقى عمي
بيتي وبيتك أصبح بيتنا
لما نجوع نقسم لقمتنا
كنت اعز وأغلى صحابي
خدلك ساتر
واقرا جوابي
أنا أرهابي
فاكر لما وقعت في ورطه
مين فكرلك رسم الخارطه
لما الزايده في يوم انفجرت
مين كان جنبك شايل همك
مين كان دمه بيجري في دمك
مين كان جاي ورايح زاير
مالك زعلان دمك فاير؟؟؟
أنا مش بعتب ولا بنعاير
حكمك جاير
انت يا صاحبي اللي أتغيرت
من أحوالك أنا اتحيرت
ماشي لوحدك واخد ساتر
حتى كلامك أصبح فاتر
قافل بابك
هاجر بابي
خدلك ساتر
واقرا جوابي
أنا أرهابي..
علشان مش راضي بتفويض
ورياء ونفاق أو تعريض
أبقى بغيض؟؟
علشان م بطالب بعداله
أصبح واطي وكلي نداله
أبقى زباله؟؟
دانا معرفش الف سيجاره
هقتل نفس؟؟ وأهد عماره
فجأه الحابل
يصبح نابل
أرهابي وبصنع في قنابل!!!
ألبس يلا يا صاحبي وقابل
كل ده ليه؟؟؟
علشان رافض اعيش ف قطيع
أسمع.. أطاطي أمضي وأبيع
كل ده ليه؟؟؟
علشان رافض انا مش راضي
أرجع فاضي
يصبح كل تاريخي الماضي
بخ مفييييش
وأرجع حرفوش مالحرافيش
خدلك ساتر
أيوه مسلح
بس سلاحي بكلمه وجمله
مش قنبله تقتل بالجمله
خدلك ساتر.
واقرا جوابي
أنا أرهابي
عايش عمري ف حالي وسلمي
حاسس ألمك
كاتم ألمي
عمري ما يوم شيلتك همي
بس يا صاحبي قلبك جاحد
أتغيرت
صرنا أتنين ومعدناش واحد
كنا روحين
وف روح ائتلفت
فجأه ابراجنا يا صاحبي أختلفت
برجك مائي
وبرجي ترابي
خدلك ساتر
واقرا جوابي
أنا أرهابي... أنا أرهابي