قالوا فيها حاجه حلوه
قلت أيوه يعني فين
ياللي ماشي ياللي فايت
جنب أرض المكفوفين
قوللي شايف حاجه حلوه
قوللي فين الحلو فين
جايز إن عنيا عايش
بيها حوله ومطروفين
عمري فيها ماشفت حاجه
حلوه خالص من سنين
غير حزين سافر مهاجر
بعد خنقه وسب دين
شوفت فيها الضرب داير
والعراك مش بالأيدين
بالبنادق أو طبنجه
أو بسنجه أو سيفين
شوفت فيها شباب معنس
والشيوخ متجوزين
واحده تانيه أو تلاته
واللي يعدل بس مين
حرموا عالشعب عيشته
وحللوا ملك اليمين
والشمال ماشيه وعايقه
بالحواجب منتوفين
لابسه طرحه وسايبه قصه
جنب قصه منكوشين
والشباب فوق النواصي
بالكلاب ومحششين
ياللي ماشي واللي فايت
جنب أرض المكفوفين
قوللي شايف حاجه حلوه
قوللي فين الحلو فين
بس فيها حاجه حلوه
فيها غنوه من الأنين
فيها حبة ناس تطبطب
لما بتشوفك حزين
فيها بيت للشعر ينزل
يسقي جرح المجروحين
يلا يمكن تلقى فيها
حاجه حلوه بعد حين