فاكره لما

فاكره لما..

كان بياض القلب ناصع.. كان صحيح الفرق شاسع

كان صحيح البيت صغير بس كان في عينينا واسع

فاكره لما..

الحياة كانت بسيطة

أي لقمة وضِل حيطة

كنا عايشين جوه زحمة

كنا عاشقين أي زيطة

إحنا لسه زي ما إحنا

بس غيرنا الخريطة

الرضا كان حالة عامة.. فاكره لما

كنا حابين الحياة

حتى لو مش هي حابة

كنا عايشين يوم بيوم

كنا ماشيين حبة حبة

فجأة كل شيء بيجري.. والحياة صبحت سريعة

كله راسم ألف ضحكة.. بس بيداري الوجيعة

البعاد بقى أمر حتمي.. والوصال أصبح قطيعة

فجأة صبحت لقمة واحدة

كوم لقم.. ييجي ألف نوع

كل براحتك مش هتشبع

عمرها.. ما تسد جوع

نفسنا.. للماضي نرجع

بس.. خايفين الرجوع

فاكره يا أمه.. فاكره لما

نفسي نرجع تاني لِمّة

نفسي بعد الرأس ما شابت

أرجع أخد تاني ضمّة

فاكره يا أمه

نفسي أنعس بين إيديكي

نفسي تاني تحضنيني

تمسحي وشي بكفك... تختفي دمعة أنيني

نفسي يرجع قلبي فاضي

نفسي أرجع تاني راضي

يا اللي شقلبتوا الميزان

رجعوني لأي ماضي