تدري وش اللي يتعب القلب ياهيه
لاصرت في وادي وغيرك بوادي
يروح صوتك وانت جالس تناديه
يرجع عليك الصوت وانته تنادي
سلمت ياصوتٍ رجع يم راعيه
ماعاد له معنى طريق العنادي
من لايجيب الصوت ماعاد لك فيه
والعلم واضح باول الوقت بادي
لاصار صوتي واضحٍ وانت توحيه
رد الجواب وخل رد الجمادي
اما ترد الصوت والحق تعطيه
او ترفع الرايه لكل العبادي
اللي بغا كذبه مع الناس ينجيه
الكذب ماينجيك والدرب غادي
يرضى ضميرك دام بالصدق ترضيه
امش ابطريق النور خل السوادي
احدٍ يحب المرجله من مباديه
تصبح معه تمسي معه بالرقادي
واحدٍ هوى نفسه تجيبه توديه
يمشي طريق المهزله والسرادي
قلته وانا مالي بكثر المشاريه
الصقر صاد وتالي البوم صادي