تفكَّر لاتوايق يامسافر جوف جمْ البير
ترقْبْ للحييا لاتذوق السم ياهدار
زمانك لو صفالك لاتحسب انك تصير الزير
ليادارت رحاة الوقت مايشفع لك المعذار
لو انك تدّعي بالعرف والتجويد والتفسير
تجاريب الزمن لوتكشف المستور، ياستار
تعلمنا من رجالٍ لهم باع ولهم تقدير
تسمّع في مذاهبهم لجل تاصل لك الاخبار
يقولون الخطأ مردود بالمثقال والقطمير
وطبع الحر مايرضى بمس الذل ولاّ العار
ومنهو جوّد احصانه عن الكبوات قبل يغير
يقولون العرب فارس وله هيبه وله مقدار
وحمران النواظر فالشدايد ضربها تعزير
ولاتلمح تبسمها سوى في حروة الاخطار
فلو تظهر نواجذها فلا ينفع لك التحذير
ولاياويك من سطوة مخالبها جدار وغار
تعلّم كيف تفْرقْ للحقايق واعرف التزوير
تشوف السبع وتميز سمات الثعلب المكار
تشوف الفرق واضح قبل لا رجلك تجدَّ السير
حصاة القاع ماتشبه وصوف الكوكب السيّار
وأنا ماني بذا جاهل ولو اني دهنت السير
اداري واحتمي رايي ولايشغلني الهذار
يعذلوني على حلمي وانا مرهجني التفكير
وكبدي كنّها تطبخ من العذال فوق النار
صحيح إن الخطأ وارد وجايز مثله التقصير
ومن يمشي طريق النور يشفع دونه المعذار
وأنا مشفق على منهو يلبّي كل داعي خير
لو انك تسمع المرزم ترى صدري عليه زرار