وَنّيتْ وَنَّهْ مِنْ فؤادٍ عِويجِ
وَنَّةْ مَريضٍ مِنْ سِنينٍ عِتايِج
أمْثال نَظْمي كِلْ ساعَه يِهيجِ
وفِكْرٍ يسوقَهْ داخِل القلب سايِج
مِنْ عادَة الله لي فؤادٍ شِفِيجِ
ومِنْ عِظْم هَمّي شاجيٍ هوبْ لايِج
إذا طِرى لي صاحِبي نِشْف ريِجي
والقلب عَاقَه مِنْ هوى الحب عايِجْ
بيني وبين الخِلْ بَحْرٍ غِميجِ
وبيد الأراضي ليْ بِعِيد الفِجايِج
لونا بِغيت اسلاه هَمَّهْ يِعيجِ
كالطَّعْن يَرِّثْ فِيْ حِشايَه زِرايِجْ
يِنْهَلّ دَمعي فوق خَدّي دِفيجِ
يا شِبْه وَبلٍ مِنْ مْزونَه دِفايج
كيف يحَمِل الاثقال مِنْ لا يِطيجِ
ولا ظِنْ يِبرى مِنْ يروحَه سَرايج
أَطْفِي الوِزا بفراح مِنْ زود ضيجي
وِإلاّ فأنا مَضْيور مانا بْشايِج
أَرْجِب لنَفْسي راحةٍ ما تِفيجِ
مِنْ جور ظَبيٍ داس فِيَّه عوايج
واظِنْ قلبي مِنْ الوِزا مَا يِليجِ
يَلين احَوِّل فِيْ بطون الشِّجايج
وَنّيتْ وَنَّهْ مِنْ بحَبسٍ وِثيجِ
مِحْرَض وقيدَه مِنحِل الساق ضايِج
أو وَنَّة اللّي مُوجِدينَه غِريجِ
أرموه واقفَوا فِيْ بحورٍ لِجايج
لونا بِيَه مِنْ ظول يَمل السّويجِ
مَا هَزِّني وَجدٍ ولا نا بْشايِج
يا عاذِلي فِيْ مِنْ خِصَالَه تشيجِ
كِثْر العَذِل والله ماني ابطايج
بِالرّفْق يا عِذَّال وِلْكم طِريجي
عَنّي تَراه النصح مِنْكم هَرايج
أنا مِسمعيّ لْعَذْلكم ما يِليجِ
مَا عَاد كِثر النّصح يِقْضي حوايج
بَدْعي عسى الموشين عِطْيَو حِريجِ
شَروات مَا شَبَّوا بقْلْبي حَرايِج
هم ابعدوني واحرموني صِديجي
مِحيِي وِطَنْيَه بو نْهودٍ لِهَايج
زين العيان اللّي هِدَبهِن وِثِيجِ
والحاظِهِنَّ فايِجاتٍ دِعايِج
سيد المها يِزهو بخِصرٍ دِجيجِ
وبِالزين يوصَف عِنْد كِلّ الخلايج
بَتَّات يِكسى مَعْ مْصَفَّى حِجيجي
يختار فيهن ملهجات النسايج
وجعود ثِلٍّ تَحت هِلٍّ رِجيجِ
وبراق ثغر من مزون الشفايج
ووَيْهٍ يِعيد الليل صِبحٍ بِهيجِ
خِدْر النّواظِر مِطفيات السّرايج
ياللّي ارياحَه نَفح مِسكٍ عِبيجِ
طِيبٍ هِدَت بَه مِنْسِمَات الثَّرايج
ما كِد نِظَرتَهْ باهِلٍ فِيْ الطريجِ
مِدَّة زِمانَه فِيْ مِقَرَّه مِضايِج
كِلاَّف يِحظونَه وهم لَه سِويجِ
شَروات م الجوزاء تراها بسايِج
سايَلْت ناسٍ عايِنَوا بِالحِجيجِ
قالوا نَعَم حِسْن بِن يَعقوب بَايِج
تِرشاف ريجَه صَافيٍ مِنْ رِحيجِ
خَمْرٍ مصَفّى سَلسِبيل التّرايج
عَيَّا يَا خُوي الدَّرَي صوبي يِعيجِ
وكِلْ ما دِعيتَه رَدّ لي هوب فايِج
مِشكاي لله ثم لِكْ يا صِديِجي
فِيْ النَّظْم لي مِنْ حَكَّموه النِّطايِج
إن رِمت يَا خِلْفان تَيْليه ضِيجي
ترى غَرامي بِالمثَل دوم هايِج
يوم اشتِكي لِكْ أَدْرِي انِّك وِثيجِ
يَا بِنْ عَليّ وِإلّا فَغيرِك نِعايِج
عَرَّضت نَفسي لِلبلا يا رِفِيجي
ولا يلوم نَفْسَه لي وِطى فِيْ الزَّلايِج
أقول بِمَّا صايبِنّي حِجيجي
وفِيْ مِثْل هَذا قِمت اعَدِّل طَرايج
أدري يِلَنّي عقب فَرقا صِديجي
صَبري تِجَلَّد لو بأَربَع دِجايج
صَلّوا عَلَى المُختَار طَهَ البهيجِ
باعداد ما صَلَّب نِسيم الثَّرايج