يطول الكلام وكل غاية لها منشود
سحايب هجوسي ب أصدق الشعر ثجّاجّه
على هلالي المنكوس قدت القوافي قود
ولبّستها من سندس الحرف ديباجه
بعد ضوّت أنوار الحفل والضيوف وفود
تراحيبنا بحرٍ تلاطم به أمواجه
عدد ما على وجه البسيطه تهبّ النود
وعدّ البروق اللي مع الخير لعّاجه
هلا مرحبا ترحيب ماله مدى وحدود
يعمّ الحضور ويبهج الصدر منهاجه
عسى ليلةٍ فيها بساط الفرح ممدود
تجود بهناها والمقابيل درّاجه
بعيدٍ عن علوم العرب والثنا والزود
ما يحتاج ابو ماضي من علومهم حاجه
أنا أشهد شهادة حق ما يلحقه منقود
ينّعم بذكره كل من عدّ .. ما واجه
تجود الليالي بالمحن والرجال تجود
بوقفاتها اللي تكسر الضيق وأفواجه
زمانٍ مضى يوم القشر والبرى مردود
والايام بين الخلق في صدّ .. ومواجه
تعدّ الليالي فعلنا والنقا مجرود
على مدّ شوف الوقت والناس هرّاجه
يعذّر سقيم العقل تفكيره المحدود
ويلقى سليم العقل ما يعقد حجاجه