بنام ساعه عسى من جابك الجنه
بريّح الراس من كثرة تفاكيره
في داخل الراس ذود الفكر له حنّه
يمسي ويصبح ولا قهوى مساييره
العام عندي هدف .. واليوم ما منّه
غابت نجومه وحظي نوّخ بعيره
ما فيه داعي أجرّ الصوت والونّه
رزقي على اللي يسوق الغيم ويديره
تحرقني الشمس واللاّهوب بالكنّه
وأقول جعل العوض في صبرنا خيره
تجول الافكار والمكتوب ما عنّه
الرزق مضمون لو طالت مشاويره
حمود بن عبدالله الشدادي
يوم إمتطى القاف حي ٍ جاد في فنّه
غنّى والإبداع رفّرف فالفضا طيره
هيّض هجوسٍ على الجزلات منعنّه
مسّيتها بالرضا ثم جتني مغيره
يا حمود كم واحدٍ عمياه في ظنّه
يومي به الإثم من ديره ليا ديره
لو ينفع الفوت لو إنه .. ولو إنه
ما شفت أحد من زمانه عاش في حيره
ما كل جاهل سبب جهله صغر سنّه
ولا كل غلطان مقبوله .. معاذيره
ولا كل من يبعد النظرات عدنّه
ولا كل ميراد راويتٍ مصاديره
من يرخي الراس لظروفه توطنّه
ومن عاش في حلم ما يغنيه تفسيره
رماح الآجال مركوزه ومنسنّه
يا طيبات المكاسب يا مخاسيره
فهد بن سفر الشدادي