صلاح منته بالأيوبي لو إسمك صلاح
مهما تمادى مدى ظنّك وطال نسمه
الحق ما يزعل العاقل يا مال الصلاح
والعبد في دبرة المولى وما يقسمه
لا صار مالك عقيدة وش يفيد الكفاح
وكثر النياشين فوق الصدر والأوسمه
كلٍ يبا يضرب البيدا مجيّ ومراح
لكن من اللي ليا جُلّ الأمر يحسمه
صلاح أخذها بكفّه يوم زرق الرماح
الله من بطش طاغيةٍ كتم منسمه
الطير ما يرفعه يا كود ريش الجناح
والوقت خصمٍ عنيد وكاويٍ ميسمه
والليل مهما تطاول مقتفيه الصباح
والحظ ماهوب دايم ضاحكٍ مبسمه
يكفي يقين التوكل لو ما تملك سلاح
حتى ولو شفت في بعض الامور عسمه
ما دام باقي ل صوت الحق داعي فلاح
بتشوف عين البصيرة للصحاوه سِمه
لا..لا تعمّ بفساد ولا تخصّ بصلاح
مهما تمادى مدى ظنّك وطال نسمه