ياليت حضي مثل حظ الحفاة الرعاه
اللي غدا حظهم بالخير يعدي عَدِي
اشوف كلن يطاول بالبُنا في سماه
حتى تساوى الكريم من العرب والردِي
وانا وغيري توسدنا الحطب والحصاه
والخوف من يوم لا يُطلب علينا فدي
ماني على المال ميت يوم اجيب الطراه
لكنّ ابا الحظ من حيث انتهى يبتَدي
والا انت يالوقت تعطيني امل فالحياه
وبثانيه ينقطع هذا الامل ويغَدي
رميتني رمية ابرع واحد من الرماه
وانصبت في جنبي الايسر عن ايمن يَدِي
لكن عرفت الحقيقه واعرف الاتجاه
ان السما فيه باب ويا النجوم اشهَدِي
ما لآذبه واحد الا قد بلغ مبتغاه
اليا احترق ضامره يمطر عليه بردِي
يالله ياللي على شانك نكب الجباه
من خشيتك يا عظيم الشان وجهي نَدِي
عطني ثقةْ قلب موسى قبل يرمي عصاه
اُوتيت منك البيان وماا بذلت اجهدِي
وارزقني اللي عطيته من رظاك الدعاه
والهمني الحق حتى للطريق اهتدِي
واجعلني الصادق اللي مايُكَذَّبْ نِبَاه
والصبر يارب خله في عيوني مدِي
واليا قضيت العمر يارب.. في منتهاه
اقبلني الساجد اللي جيت في موعدِي