الحظ ريشة مؤلف..! والحياه الكتاب
والعمر صفحه عليها كل عابر يبوح
اما بريشة صقر.. والا بريشة عقاب
واحد عبرها مطر.. وآخر عبرها شحوح
هذي ترى فلسفة شاعر.. كتبها وشاب
قوله يقين وحقيقه..! مايحب المزوح
آمالنا من تَحَت سكين قص الرقاب
واحلامنا.. ماتعدى جدرنا والسطوح
اتعبت ركض المشاعر في جناب الغياب
واصبح سراب اللقا في عين عشقي يلوح
بين انكسار المحبه.. والغلا والعتاب
كل امنيات السعاده ضيعتها الجروح
من يتبع العشق يوقف به على كل باب
لايامن العُشق حتى لو بنابه صروح
ان غاب عنه العشير وبان فيه المُصاب
يبقى على جمرة الذكرى حنينه يفوح
والقلب حتى لو انه ساطي ومايهاب
يذّله الشوق ويخليه لدن وسمووح
يسري على طُرقة الغالي يحث الركاب
والا على عود ورقاً شال حزنه ينوح
ولو معطيات المحبه كل ابوها خراب
يبقا الحبيب الوفي للحب قلبه شفوح
ياللي بيدّك تقود الوصل مثل السحاب
امطر على روح ضامي قبل روحه تروح