تنفس الصبح عطر وجنح ليلك ذهب
استبشري الشمس ماتخلفك ميعادها
جاتك تشيل الهبوب اللي معاها تهب
ريحة رذاذ المطر في روضة عادها
من رائح المزن مختلطة عجاب وعجب
تلقى بها الروح سلوتها وميلادها
يا سنبله من سمو وحسن ذات وأدب
يا الحاضر اللي يجمّل ماضي أجدادها
ضمّيتي الزين والمنسب لروح الحسب
صورة تشد المشاعر كامل ابعادها
شفتك بلمحه بعدها كل هاجس ركب
سحابةٍ ممطرة عذب الهواء قادها
قومي على الشرفة اللي صبحها منسكب
قهوة صباحٍ حلاك ان ذاقها زادها
وفلي جريدة شعورٍ فيك كم انكتب
يغني عن ابداع خلق الله ونقادها
لصب فكري لك الإبداع فالوا عذب
ما أحدٍ درى ان العذوبة حبك قنادها
يامن صمته عقاب وصمت غيره عتب
لمن ضحكتي تفزّ الخيل في مادها
وإن زغردت عينك الهادي يعود صخب
ما كنه إلا احتفال الناس فأعيادها
هيا اشعليني وخلي كيد عينك حطب
ابي اشتعل نار لجلك يصعب اخمادها
عينت طاريك ليل البارحة وش نهب
من داخل الصدر غير العين ورقادها