اليا فقد صوت الغلاء سمع غاليه
وذابت على لاماه خضر الأماني
ما ينفع الملتاع شيءٍ يسويه
لو صب في سمع البعاد الأغاني
قلبي يتحرى له حبيبٍ يناديه
وعيني على خطوة كئيب الثواني
يهس طرفي لين طيفه يصحيه
ويصحى معه قلبي ويصحى لساني
وأقول يا طيف المحبين لبيه
لبيه يامن فيض حبه ضناني
تعال واسأل صاحبك ويش أمانيه
اليا أنتصف ليله وقلبه يعاني
لا تندهه باسمه كثيرة أساميه
قد قلت له أسمك هواي وزماني
أنا رصيف المركب اللي موديه
ولا زالت أقدامي تزور المواني
وأنا الظماء من حول هدّاج اشافيه
أظمى وتبخل با الزلال السواني
وأنا اللحن في عذب صوتٍ يغنيه
اللي خطف صبوة قلوب الغواني
وأنا الشفق وأنا السحَر والمشاريه
اللي كتب فيها الخوافي بناني
وأنا وهج عصر الغرام ولياليه
اللي على نوره نصيبي حداني
وأنا الذي أغرا حبيبه على التيه
من يوم ما اقراه القصيد وبداني
وأنا الذي يشتاق للشوق ما يجيه
وأشتاق أجي للشوق لمن بغاني
وأنا السكوت اللي بليغه معانيه
في حضرة اللي للمراية حكاني
يا مسافرين ليا وصلتوا حراويه
فالديرة اللي زرع أهلها أرجواني
قولوا له اشهورٍ عن الوصل وش فيه
عساه ما طال الزمان ونساني
ومرّوا على ضيدان ماني بمعفيه
بيحس فيني وايتجمل عشاني
قولوا هكا الرجّال لحدٍ يخليه
عساه ما يبلى بشيِ بلاني
ما عاد باقي لخاطري ما يسليه
إلا ما ينسج باذخٍ من معاني
أكذب عليه إن قلت سالي ولا أبيه
وأكذب عليه إن قلت له ما جفاني
وإن متّ يتركني على راحة يديه
اما ذبل مهموم وإلا بكاني
تكفون تال الليل ما حب طاريه
طاريه تالي الليل ضيفٍ أناني
ليته طريق أشباح فالليل واسريه
ول أموت لحظات أشتياقي مكاني
ومهما قسا طيفه عسى الله يحييه
يختار ما بين النظر والمحاني