مش نص ولا ناقصة عقل
ربنا خلقني كاملة بالعقل وبالقلب
مش لعبة في إيد حد ولا ظل في الدرب
عايزة عدل مش إحسان
مش صدقة من قوانين زمان
مش عايزة ضُرّة تشاركني حياة
ولا خيانة مرة توجع قلبى
ولا اعيش فى نكد أو مآساة.
مش عايزة أعيش أيام مُرّة
ولا أتحاسب على ضعفي
لانى انثى كأنّى عار وعورة
أنا إنسانة ليّ حق وكرامة
مش ديكور في بيت،
ولا جارية ولا بالضعف رضيت.
ميراثي حقّي مش منّة ولا عطية
مش هستنى أخويا يرضى عليا
ويورثنى زيه أو يجب عليا بحق!
ده حقى فى الحياة اعيش بكل امان
ولا انى اعيش يوم مكسورة وضحية !
مش هروح لكل اخ يوم
وارمى عليه اللوم واقوله اصرف عليا
محدش بقى يتحمل حد ولا بيشل الآسية.
أنا وأخت وبنت وأم وصاحبة قضية
صوتي عالى مش همس وخفية
مش هسكت عالظلم ولا أعيش مكسورة
اللى ترضى بالمهانة، عمرها ما تكون حُرّة وأبية.
أنا بنت راجل، والعدل سلاحي
مش هخاف من نظرات ولا وشوش كذابة
ولا عدل رمانته مايلة ولا كفة قليلة
هفضل أقولها بالعالى ومليانة إصرار
المرأة حقها زى الراجل… واختيارها
وقوتها واستحقاقها قرار وانتصار ؟