البارحة شفت الغروب وذكرتك
وليت حزني شابهه في مغيبه
ويا بوح شعري بالمشاعر كسرتك
بسباب شاعر فاقدٍ له حبيبه
ويا جرح أنا ضيفك ودايم سهرتك
هذا حبيبي ليت تعرف تصيبه
يا دمعي الملهوف قصّة شهرتك
بالذّكريات المؤلمة والعجيبة
يا ليت ممكن في لحافي دثرتك
وأقول وقّفت الدّموع السكيبه
وقول ما قصّرت واني نصرتك
وأقول جرحٍ لاقيٍ له طبيبه
أحيان يمكن في قصيدي قهرتك
تنزل نزول الراس واحيان هيبه
هيذي مشاعر ما يصير وغدرتك
شاعر ولا ردّك بدمعه وخيبه
يمكن إذا صرت السّنابل مطرتك
وذوق طيبك وآتهنّى بطيبه
وإذا تصير الأرض حبّي زهرتك
ومْنِ النّحل تاخذ حلاوة عسيبه
يا ليتك بميّت وجثّة قبرتك
وأقول كلٍ ماخذٍ له نصيبه
انسى وكذّب ليتني واختصرتك
بس عيب أفشّل في هلا واستجيبه
واثري حسبتك كالمحيط وبحرتك
واثري بأبحر في سفينه كذيبه
الميّ تخدرها وقولك غمرتك
غمرة مخادع والشواطي كئيبه
يا جرحي الأكبر بقلبي حشرتك
وزهرة الأحزان تطلع بشيبه
يا ليتك المَيّة بكبدي عصرتك
ودّي تناسي عاد من هو يجيبه