تفنن مثل عاداتك.. في تعذيبي وانا مغليك
شرِّق بي وغرِّب بي.. ولا يطري على بالك
تخاصمني تواصلني.. أنا كلّي فدا عينيك
أنا راضي بتعذيبك.. مدام إنّي من احبابك
تلاعَب بي على كيفك.. تمادى وسَوْ ما يرضيك
هلا بْكل الجروح اللي.. تصيب القلب ب اسبابك
أنا من يدّك اليمنى.. إلين اطراف يدّك ذيك
أنا كلي فدا عيونك.. ومتغاضي عن عتابك
ألا يا حبي العذري.. ترفق بي إذا يمديك
انا ما اشكي ولا اتألم.. وراضي بكل أحوالك
فديت عيونك النجلى.. فديت التأتأه اللي فيك
فديت النظره الخجلى.. فديت شفاك واهدابك
فديتك والقمر ما بين.. جدايل ليلها يكسيك
إذا أرسل سنا نوره.. يضيء الكون بانوارك
فديت الخال والخلخال.. وشهقه طالعه من فِيك
من الفرحه تمايلتي.. وتباهيتي بفستانك
هلا يا عودك الراوي.. إذا هب الهوى يثنيك
هلا بالخوخ والرمان.. هلا يا ورد بستانك
هلا ي اْجمل قصيدة حب.. رسى قلبي على شاطيك
هلا بْكل الدلع والتّيه.. وسِحْر وليْن ميَّاسك
هلا يا ملهمة شعري.. حروفي كلها تعْنيك
هلا بك والعنب والتوت.. يتوق لطعم عنَّابك
هلا بك والحسِن يأخذ.. جماله مِنْك ما يعطيك
يغضّ الطَرْف ف حضورك.. ويتغنَّى بأوصافك
عليك اقول بسم الله.. عسى رب السما يحميك
بعذرك لا تغطرستي.. عسى الله يلوم من لامك
هلا يا فتنة الدنيا.. ترى كل النساء تطريك
يغارنّ العذارى من.. جمالٍ صب في جالك
اعيذك بسم رب الكون.. من إعيون الحسد وارقيك
عسى عين الحسود تعود.. تجي في قلب من صابك
هلا بك يا ضوى عيني.. حياتي كلها تفديك
هلا بك كل م اقبلتي.. وفاحت ريحة اطيابك
هلا يا كل أشواقي.. ترى صوت الهوى يدعيك
هلا يا نور كل الكون.. هلا بالشوق لا جابك
هلا بْجَيّتْك ووصالك.. لعينٍ دايمٍ ترجيك
هلا ي الموعد الغالي.. ورود الدار تزهابك
هلا يا لهفة العاشق.. تراي اليوم ملْك إيديك
هلا بك لا تسلطنتي.. وعزفتيني على اوتارك
هلا بك لا ترَنّمتي.. وهمستي ب.. اعشقك وابيك
تراقَص قلب معشوقك.. وذاب ف صوت موالك
هلا بك كثر هالعالم.. هلا وان كان ما تكْفيك
هلا بك من هنا لهناك.. وكثْر الشوق في غيابك