مَسَّها بالخير وشْ سِبَّة سكاتك
وشْ عُلومِك ما نشدتي عن علومي
جَيّتِكْ يَمِّي مثل نِسبة زكاتك
إن ما حضرتي بَ اكْمَلِك تكفين قومي
المشاعر ما تغطّيها عباتك
لا تِهدِّي يالغلا فرحة قدومي
لا يصيبِك شكْ منّي في غلاتك
يا ضوى شمسي وقمراي ونجومي
يكفي اللي صاب عيني من حلاتك
ما اشتكي مِنِّكْ انا اشكي قِلْ نومي
اسهرك مشتاقْ وانتي في سباتك
أشغَلَتني صورتك حتى فْ حلومي
ما سهيتي مرةٍ وانتي ف صلاتك
كم صلاةٍ عدتها وافْسدتْ صومي
ما خلِقْ في الكون من يشبه صفاتك
يشهد الله شوفتك تِجْلي همومي
ما يغار التوت الا من شفاتك
أحمد الله يوم حَطّك من قسومي
قد وعدتك مَ اخذلك يومْ بحياتك
والوفا بالوعد بعضٍ من سلومي
لو طلبتي الروح منّي قلتْ جاتك
يا القمر والشمس في ليلي ويومي