نجمة الصبح لك هذا الخطاب
اخرجي من ورا الغيم اخرجي
واعديني على متن السحاب
واصدقيني وانا فالوعد اجي
لجل افصّل لك القمرا ثياب
والثريا سرير وهودجي
واشتريلك من الجوزا كتاب
فيه سر الغرام ومنهجي
مازجة دمّي بلون الخضاب
كيف هذا بهذا يمزجي؟!
خبريني عن اسباب الغياب؟
قبل روحي لربي تعرجي
لهفتي وايقة روس الهضاب
والوله فالضلوع يلجلجي
في خفوقي هجير وشمسآب
والعطش فالعروق يعجعجي
في صحاري هواك اتبع سراب
اتمنّى وصالك وارتجي
لين راسي من الاهوال شاب
وصار ليلي كما الصبح ابلجي
مل صبري وتعبنّ الركاب
وهبّت الريح واطفت مسرجي
واقتنعت!! الهوى قطعت عذاب
وصرت ادوّر لنفسي مخرجي
وش حداني على ليل وضباب
وقل زاد وطريقٍ اعوجي
دوك قلبٍ من الصكات ذاب
يالحبيب الخصيم الدعوجي