ياعينى عالقلب القاسى
لمَّا حبيبى يكون ناسى
أشرب مرارُه من كاسى
حبيبى
سافر بدون مايوَدَعْنى
من الفراق قلبى واجِعنى
مابقاش شايفنى ولا سامعنى
حبيبى
دا كان قايللى لا حسيبِك
ولا أهجرك دانا حبيبِك
إنتى قدرى ونا نصيبك
حبيبى
سافر ورايح يتغرب
يوم اللُقا إمتى يقرب
ياشمس عمرها ماتغرب
حبيبى
ماأقدرش أنا أبعد عنكم
عارفة بإنى واحد منكم
أبعِد وأرجع تانى بينكم
حبيبى
سلِّم علىَّ... وفرَّحنى
وكلامُه حلو ويِشْرِحْنى
دايماً وجوده يريَّحنى
حبيبى
قال الفُراق صعب ولَكِن
أبداً ماتبعِدنا.. أماكن
وهواكى ف القلب ساكن
حبيبى
قلت لُه.. إوعى ياطيرى
قلبك يميِّل على غيرى
إنت طريقى ومَسيرى
حبيبى
قاللى مسافر وراجِعْلِك
ف القلب جوَّة أنا جاعْلِك
ماقدَرْش أبداً على زعَلِك
حبيبى
قاللى حتِلْقِى مراسيلى
واصلة لغاية مايجيلى
قَطَعْها بَلِّيت مناديلى
حبيبى
سلَّم علىَّ وراح ماشى
سافر حبيبى ومجاشى
فرَّح حسود ريَّح واشى
حبيبى
سلَّم على... وقال راجع
أنا ياحبيبتى... ما بخادع
مارجعشى.. زودنى مواجع
حبيبى
سلم على... بطرف العين
فاتنى ماقالشى... رايح فين
يامين يقوللى طريقه منين
حبيبى
من غير سلام ولا حتى وداع
سافر حبيبى وقلبى ضاع
هانت عليه العِشرة وباع
حبيبى
سافر وفاتنى حبيب الروح
وتَرَك هنا جلبى مجروح
خُدْ لُه سلام ياحمام الدوح
حبيبى
سلَّم علىَّ وجاللى: يازين
على الوطن أنا جلبى حزين
دى مصر غالية وجوَّة العين
حبيبى
سلَّم على...بعد فراق
قاللى: تعبت من الأشواق
أصل البعاد مُر وحراق
حبيبى
سلَّم علىَّ بطرف الإيد
حبيبى حيسافر لبعيد
خايف يلاقى حب جديد
حبيبى
سلَّم على وقاللى سلام
وكان كلامُه أحلا كلام
رايق ومايكفينى كلام
حبيبى
سلَّم علىَّ... وودعنى
وفاتلى قلبى يوجعنى
دايماً حبيبى يلوَّعنى
حبيبى
سلَّم علىَّ... وراح لبعيد
سافر خلاص بدون مواعيد
بخاف عليه من حب جديد
حبيبى
سلم على... مقالشى كلام
سدِّد بعينُه ف قلبى سهام
وعيونى أنا مش قادرة تنام
حبيبى
سلم على... وقال فينك
كانو خطوتين بينى وبينك
تعالَى تِسلملى... عينك
حبيبى
سلَّم سلام... لَكِن بالعين
بنظرة واحدة... مِش إتنين
ماعْرَفش منه أروح على فين
حبيبى.. لمَّا جابلنى
حبيبى
سلم علىَّ سلام مُشتاج
وجال تعِبت من الأشواج
ماهوَّة دا حال العُشاج
حبيبى
سلم على.. وف عينه دموع
وماقالشى إمتى يكونلُه رجوع
القلب فى بعادُه.. موجوع
حبيبى
سلم على... وطمِّنى
وقال ماعُمره ح يألِمنى
حبيبى دا... حتة مِنِّى
حبيبى
سلم علىَّ.. بحُب وشوق
قاللى غِلِطت وليك محقوق
الفرح ف بعادك ما بدوق
حبيبى
سلَّم سلام بِطرف الإيد
ف ملامحُه باين حُب جديد
وقال: أنا مسافر لبعيد
سلام يا حبيبى
سلم على... وهنَّانى
حبيبى راجع من تانى
يوم الفرَح يوم ماجانى
حبيبى
سلم على وصوتُه حزين
وقال مسافِر بعد يومين
وراح ماجانى بقالُه سنين
حبيبى
سلَّم على ونا محتار
فاتنى من الجنة للنار
زى الزمان حبيبى غدَّار
حبيبى
عدَّا عليَّة... ماقال سلامات
نظراته بتقول... حبنا مات
ماعادشى بينَّا خلاص كلمات
حبيبي