أنا الأديب ... الأدباتى
وهبت قلمى وكتاباتى
لحد ماييجى مماتى
حيكون كلامى فيه عِبرة
الله الله يابدوى جاب اليسرا
أديب وأدباتى .. وغاوى
لحال بلدنا أكون راوى
الكلمة من قلمى تداوى
فارس وراكب عالمُهرة
الله الله يابدوى جاب اليسرا
أنا الأديب ومانيش مكّار
وإبن نُكتة وعارف الكار
أكتب لكُل الناس أشعار
وحياة مقام ستى الطاهرة
الله الله يابدوى جاب اليسرا
أحوال بلدنا أرصُدها
وكلمتى شمعة أقيدها
والفكرة تانى أجدِّدها
لا غاوى طبل ولا شُهرة
الله الله يابدوى جاب اليسرا
الفن دا ناوى أحيِيه
ميهمنيش باشا أو بيه
لو فيه غلط حنشاور ليه
ونقول عليه جوَّة الفِكرة
الله الله يابدوى جاب اليسرا
قلمى يكون صوت للغلبان
وكلامى بَلْسَم للعيان
وسهامى تضرب ف المليان
من غير ملاوعة أو شفرة
الله الله يابدوى جاب اليسرا
أدباتى وكلامى شعبى
عاشق لبلدى ول شعبى
بحبه من راسى لكعبى
واقف قصاد كل مؤامرة
الله الله يابدوى جاب اليسرا
الفكرة دى أنا حبِّيتها
بقلبى وبروحى سقيتها
ولا يوم أقول إنى نسيتها
أدباتى محسوب عالشُعرا
الله الله يابدوى جاب اليسرا
أكتب وأتخطَّى الغلطة
ولا يوم حكون بوق للسُلطة
أصل الخيانة ياناس غلطة
أطول من العُمر ياحسرة
الله الله يابدوى جاب اليسرا
واقف بقلمى لأى سفيه
أقول على عيبه اللى فيه
ومهما كان نورُه أطفيه
علشان يكون للغير عِبرة