شخنا وفقلب جلدنا اتسلخنا
قبل العشرين...
حسينا فجوفنا شرخنا
شخنا وقبل نشيخو صرخنا...
غيثونا قبل يدينا مسخنا
السيفة سيفتنا...
والدواخل دغيرنا
اتنسخنا
مقسوم ظهرنا...
معدوم صبرنا...
معلوم امرنا...
موشوم فجلدنا امرنا بظفرنا او من غير ظفارنا
طليت من تقبة فراسي
طليت خيط الضو وبحصصت فالطريق
بغيت نرد انفاسي
لقيت الما عقل..شدو فعقلو لحريق
فمن اتيق؟؟
تبعت طريق الما المحروق لعين الشمس
مشيت لها نرضع
والطريق شادة الطريق تقولي تبع
ملي وصلت لعين الشمس المكنونة
لقيتها طفات وغير الصهد لي جاني
قلت ليها الحاميا وسخونة...
لي فيا ما هناني...وخا يربطوني من لساني
وخا يربطوني من سناني...ندردك
قالت لي تلاح فلبحر...او دخل لسواق
عيش فلخواض بركك
بغيت نولي ما لقيت علاش
لخيط لي جابني ولالي نعاش
قالي موت او عيش...
وايلا بغيتي ما كاين لاش
وايلا انت وليتي...
ارضى بعيشة لمعاش