بيدور .. ويلف
يدوخ "م" اللف
يسف تراب الشارع .. سف ..!!
بدال الكف
بياخده الضعف
يكيلوا عليه الكيلة .. بألف ..!!
وبرضو يقول
الشيلة أخف
ويرجع تانى .. لأخر الصف ..!!
الساقية تدور
يستنى الدور
يتلموا عليه .. نسر ودبور ..!!
قرص وتقريص
رقص وترقيص
ويغموا عنيه .. مايشوفش النور ..!!
ويخاف وينخ
ويشهد زور ..!!
علشان بيخاف .. ع الحلم يبور ..!!
ويعدى الشهر
تلات تيام
ويكمل باقى الشهر .. صيام ..!!
وبحسرة يقول
هو إحنا نطول
ده كفاية إن .. إحنا بخير وسلام ..!!
زى النعام
يتغطى .. ينام
وبيبنى لسيدنا .. الوالى مقام ..!!
ومدد يا سياد
الخير أهو زاد
ف السعر .. وقل .. ف إيد لولاد ..!!
ومبارك عاد
والشعب إنكاد
علشان السلطة ف إيد أنكاد ..!!
عادة وتنعاد
على اى بلاد
ماتقيمش لموت الشهدا حداد ..!!