سلسال وجع مربوط ف شخليلة
منصوب ف عز النغرة ضليلة
طافوا الحيارى ف البلاد عصرة
رقص السكارى بجملة الشيلة ..!!
شر "البلية" وللأسف .. بكى
شر "البرية" زم .. وإتكى
والعضم خايخ والجراح أنكى
والسكة عتمة يا قلة الحيلة ..!!
ديك لم يؤذن ع الفلاح مرة
طقت ف "عرفو" وكسر الجرة
من ظلم ناسو جرت الكرة
حتى اللى صاحى خدلو تعسيلة ..!!
يلعب على المشاريب وبيربح
جرح الغلابة ينز ... ويضبح
جوكر يقش .. يدش .. ويقبح
كداب ف زفة عمل له هليلة ..!!
قال يا أمير الطير بنى عشو
قال هات له قمح وعالجبل رشوا
حتى السباع ف الأرض يتعشوا
بالعدل كيلة تربح الكيلة ..!!
ياالف حسرة ماكنتش أتصور
قلب الملايكة إزاى بيتعور ..؟!!
وإزاى تداوى ومرهمك هور ..؟!!
ف جراح طواها الدهر بالتيلة ..!!
كنا الإمامة والجميع أتباع
حب الزعامة ركب الأنطاع
دم اليمامة ع المشاع يتباع
دم العذارى "تفض" بالليلة ..!!
متمرمطين ف الأرض باع ودراع
مستسلمين للشارى .. والبياع
متعشمين ف السبع يوم لو جاع
تصبح بحور الدم .. توصيلة ..!!