أنا وأنتي قصيدة قتلها السرد... !!
الدنيا بتخطف قلب الحلم
ف وقت الجد... !
وأنا واقف فارش أحلامي
والشارع سد... !
طاب فين هتروح... ؟!
والروح من عزم القهر جروح
وألمها اشتد... !
أنا وأنتي وبس ومالناش حد... !
ألم وحروف...
وعيون بتشوف...
م الدمع حاجات... إزاى تتعد... ؟!
اعملى معروف... !
أنا قلبى اتعلم...
يروى من الأحزان الورد... !
وماتعلمش يموت م الخوف... !
أنا حد اتربى على الحواديت
وبلاد الواق... !
وعشقتك ست الحسن
ف كل حكاية ختامها فراق... !
وعشقت الحبر لأنه دوايا
وفيه ترياق... !
وماكنتش شاعر...
م اللى يرص كلامه ف أى حكاية
وكل مناسبة... وأى نطاق... !
ولا واعظ لجل اقلبها مناحة
ولت وعجن عن الأخلاق... !
ولا يوم وطيت لغرور يركبنى...
سنة وفرض... !
أنا ابسط معنى اتقال ف الشعر
على الإطلاق... !
أنا طرح الأرض... !
عشان م الأرض
وقفت ف آخر صف الشعرا
وكنت الفرد... !
العيب مش فيا ما تتخضيش
العيب ف الفقر وأكل العيش
العيب ف الفرصة اللى مابتجيش
وان جات بتقابل مليون سد
وجزر ومد...
والف حريقة بتستناها مواسم جرد... !
أنا وانتي قصيدة قتلها المط
وكتر السرد... !!