حبك مواسم..!!
حبك مواسم.. طرحها غلة
تطعم ولادك...
ليه طرحتى دريس؟!!!
وليه رميتى السم ف القلة
وفتحتى ليه...
للدم ألف هويس!!!
رفعت صوتى.. قالوا يتسلى
وطلبت قوتى
وكان عشم إبليس!!!
قررتى موتى وكانت الذلة
وفتحتى باب السجن للمحابيس..!!
وكسرتى بابى والكلاب ضالة
تنهش ف لحمى
كأن لحمى رخيص!!!!
صرخت فيكى.. يا سما وضلة
دول سلموكى...
من جبان... لخسيس!!!
عزز وجوده و(مكن) الشلة
ونصبتى عودك...
مشنقة... ومتاريس!!!!
ليه خيرونا وصمتنا علة
بين الخيانة ووكسة التوريث؟!!!
قامت قيامة صبرنا خلى
الخوف مذلة..
والسكوت تجريص..!!
جابوا اللى منهم تانى يتولى
وعشمونا كتير بعجل أبيس!!!
كملتى نومك واللى فات ولى
حبلت فؤادة وخلفت عتريس!!!!