جوانا روح..!!
لسه فاكرة
إن وصف الحب عندى
روح ودبت جوه روح
لسه نفس الوصف هٌو
روح بتدى التانية روح
لما بتعافر.. بقوة
تلج دايب جوه ميه
كل ذرة ف حضن ذرة
بلّوا ريقنا ف صيف بؤنة
كميا بينهم.. كل مرة
حلوة.. مرة.. تزيد ما بينهم
واللى ياما خوفونا
لو بإيدهم يفصلوهم
يبقوا ييجوا يفرقونا
ده إحنا أقوى بألف مرة
للنهاردة يا حبيبتى
للنهاردة
لما "ب" أحضن ذكرى منك
بعد "وِرد" الليل وأنام
أو يصاحب ضل روحك
جفن عينى "ف" المنام
ولاّ ضحكة رقيقة عدت
وإحنا "ف" المرة اللى عدت
قبل منها.. "ف" الحقيقة
كان ما بينا خصام كبير
لمسة الإيد البريئة
فجأة تبقى شئ خطير
يلاّ قوم أنا عاوزة أمشى
طاب ما تمشى
ولاّ عايزة خط سير
يبقى لون الخد.. ورد
يلاّ.. بتكلم بجد
بس آه لو تهدى حبة
يا حبيبتى بلاش مناهدة
إحنا أكبر "م" الكلام ده
إقعدى "ل" يشوفنا حد
تقعدى وعنيكى.. شاردة
تلمحى "ف" إيديا وردة
تخطف البوسة المعاندة
فوق شفايفك من سنين
قلبي يضحك قبل منك
ضحكة تطلع غصب عنك
وتداريها.. برغم إنك
وانتى "ف" الأحلام "بهية"
قلبى "ف" الواقع ياسين..!!
المواجع.. هى.. هى
الحناجر.. والعجين
واللى باعك غصب عنك
واللى باع دنيا ودين
واللى شال على راسهٌ طين
نفسهٌ يمسك عقد شقة
ولا اوضة.. ف أى عين
واللى عاش الضحكة سرقة
ليشوفوها البصاصين
واللى بيعيط بحٌرقة
كل لقمة يجيبها دين..!!
دمعة الواد الصغير
لما يسأل فين دواه
رد أبوه عليه يحير
أصل تمنه مش معاه
أمهٌ تبكى جنب منهْ
عندك إيه ما تقولش آه
يا بنى سيب أبوك ف حيرتهٌ
يا بنى باع كل اللى حيلتهٌ
واستلف من كل جيرتهٌ
يقطع الملعون وسٍيرتهٌ
قول لنا راح نعمل إيه؟!!
هو ده المقدور عليه
خبطّت ولا ألف باب
والحياة ماشية ف طريقها
الحضور زى الغياب
كل آه تبلع ف ريقها
ضحكتك.. طاب مين سرقها
من عيونى المشتاقين
(يا بهية وخبرينى..
عن حال العاشقين..!!؟؟)
الكلام يخسر براءتهٌ
والسؤال يرفض إجابتهْ
قلب عاشق.. مين يصدق
ييجى يوم يكره حبيبتهٌ..!!
كٌنا أقوى م السنين..!!
(يا بهية وخبرينى..
ع اللى فرقنا مين..!؟)
حاجة عن أوجاعنا وانتى
يا حبيبتى عايشة فيها
واللى عنده حاجة حلوة
كان ضرورى يخاف عليها
مين يداوى الجرح مين..!؟
" يا بهية وخبرينى..
ع الحبوع الحنين "
ده احنا هامش بس عايش
جوه هامش تانى غيرهٌ
حلمنا ف الحب طايش
غيرنا بيحدد مصيرهٌ
مين يلم الشمل.. مين.!؟
(يا بهية وخبرينى..
ع اللى قتل ياسين)..¡¡؟؟