عيشك وملحك.. ع الكل هاين
حتى اللى منك.. ماعدشى باين..!!
بتغيب وترجع.. ولا حد سائل
الدين عليك.. وإنت المداين..!!
اعمل حسابك.. الكل سابك
وبقيت لوحدك.. ف الدنيا عايش..!!
وفر عتابك.. أيه اللى نابك
حبل المودة.. قديم وبايش..!!
إنساه بقى وإرتاح..
ماعدش فيها سماح
باب العشم مقفول
بالضبة والمفتاح..!!
دول داقوا لحمك.. وعرفوا إنك
طيب وآخرك.. يا دوب تعاتب..!!
تحبس دموعك.. ما بين ضلوعك
تبلع خضوعك.. وده اقل واجب..!!
تعمل بأصلك.. الجرح واصلك
لو حتى تهلك.. الكل عايش..!!
وفر عتابك.. أيه اللى نابك
حبل المودة.. قديم وبايش..!!
إنساه بقى وإرتاح..
ما عدش فيها سماح
باب العشم مقفول
بالضبة والمفتاح..!!
خدعت نفسك وقولت لمة
دفعت عمرك وباعوا هما..!!
وكنت خايف تجرح شعورهم
لكن بدورهم باعوك بذمة..!!
بلاش تحايل ف طبع مايل
وانت اللى شايل والكل عايش..!!
وفر عتابك ايه اللي نابك
حبل المودة قديم وبايش..!!
إنساه بقى وإرتاح..
ما عدش فيها سماح
باب العشم مقفول
بالضبة والمفتاح..!!