هى "حتة" بنبوناية
هو "شكلا" مش أوى
هى عارفة إنه طيب
هو "واد" غلبان أوى
كان بيعشقها بجنون
هى "كات" حباه أوى
حد من "ريحة" زمان
كلمته ف رقبته دين
هى عطياله الأمان
بس كانت "عين" و "عين"
عين بتنده ع السعادة
وعين حريصة حبتين!!...
هو كان بياع امانى
سوقها "باير"
والزمان قلاب وداير
كل طلعة شمس
كان بيستنى البشاير
يجرى "يلفع" فوق كتافه
حلم يشبه ف إختلافه
مع الزمن ده
كل احلامنا المعاندة!!...
يمشى ف الطرقات ينادى...
قول ياهادى
عندى حاجة...
من زمان راحت لحالها
عندى "حب"...
يكفى الناس بحالها
عندى "كلمة طيبة"...
للناس تقولها
لسه "بياع السعادة"
بحلمه داير!!...
هى كانت كل يوم
تفتح له بابها
يجرى "يديلها" القصيدة
وفوقها وردة
هى "تديله" إبتسامة
نظرتبن... و مع السلامة
هو يمشى و هى شاردة
شايفة روحها ف القصايد
بس خايفة
هو شاعر عاش خياله
هى عايشة وسط الناس
وشايفة...
ألف مليون إحتمال
يفرض ف نفسه
بس حاسة باللى حاسه
رغم إن الحظ "غير... "
خط سيره
هو كان يعشق سيرتها
هى كات "تبلع" حيرتها
كل م "بتلمح" صورتها
جنب صورة "حد" غيره... !!