يمين بالله

يمين بالله..

أنا "خدت" الكلام منك

كأنه منام..

وأنا من عادتى مش بفرح

لا ف الواقع.. ولا ف أحلام..!!

ولا إتعودت م الأيام دى غير المر..

يمين بالله..

ما كان قصدى الكلام ده يمر..

يمر إزاى..؟!!

وأنا طول عمرى " بتنشق "

على ريحة.. حكاية تسر..!!

سامحينى..

سكوتى ماكنش بإرادتى

ولا ردى "العوج ".. كان " صد "..

ولا فكرت لو لحظة.. يكون ده الرد..

ماستوعبتش الموقف

وإيه جاب الملايكة الأرض..؟!!

وليه فجأة.. ترد الروح

على قلب اللى كان " حطب "

ومتعطب.. ويطرح ورد..؟!!

وفجأة..

بتفتحيلى الباب على الفردوس..

وم الكوثر..

تمدى لقلب عاصى.. وريد

" ونقلة "..من نقيض.. لنقيض

وفرصة للحياة.. بتزيد.. وتملى الإيد

يا طيبة قلبك الشفاف..

حقيقى الفرحة فوق طاقتى

حقيقي بخاف

ومن حقى أخاف.. وأخاف

وأنا شايف

سنين العمر بتعدى.. تملى عجاف

وأنا اتعودت طول العمر

أعيش ف الضل جنب الحيط

ولا من شاف..!!

يجوز إنى.. كمان " أخطأت "..

ومن عزم المفاجأة.. رضخت..

لظنونى.. فاسامحينى..

بتبقى الفرصة ف إيدين الحزين يفرح

يضيعها.. قليل البخت..!!