الأوله "حبة"
زرعوها أهل المحبة
ف الغيطان "حبة"
لما علت "حبة"...
والتانية "ضلة"
يامرتبة شقيان
وناي فنان
وراكية شاي
وهات "حبة"...
والتالتة "حابة"
تميل حبة
مع نسمة عبير "حابة"
تبوس إيد اللي شال "حبة"...
م الأوله آه
والتانية آه
والتالتة آآآآآه... وزيد حبة!!!!
الأوله ياميدان...
وانا اللى مدان وهان... قدرى
وبقيت حصان خسران وده قدرى
ازرعها بالفدان واحصد مواجعها
مين هايراجعها دى بايعة من بدرى؟!!!
قال ياعديم المروة مين صلب حيلك
محتاج نبوة؟!!... ومين هيديلك؟!!
مش كل نوة... تصر منديلك!!!!
حبيت وجودك لما فاض... نيلك
عشمان يجيلك راح لمين ربى!!!!
م الأوله آآآآه
والتانية آآآآه
والتالتة آآآآه... وزيد حبة!!!!
والتانية آآآآه...
طرحت شواشى الورد بالجمرى
تمران ياعيشى ولا لم تمرى؟!!
قال ياولى الامر فين تمرى؟!!
فاتت سنين واحترت انا ف امرى
قال هز طولك... واطلع النخلة
واحفظ مقامك وارمى ف المخلة
وانفض قلوعك م الوجع... تخلى
طاطى لريحك مركبك... تجرى
تسكن مقابر... واسكن القبة!!!
م الأوله آآآآه
والتانية آآآآه
والتالتة آآآآه... وزيد حبة!!!!
والتالتة آآآآه...
مكتوب عليكى الغالى يتهمش
قوت الغلابة حلم ف المشمش
طاب والعصابة قالوا ماتذمش
لتروح ف دوكة وبرضه ماتمتش
اصل ف زمانا الموت مابيلمش!!!
ساقية ودايرة بس مين سقا؟!!!
يروى العطاشى يصون مايتبقى
ده الجوع ياباشا دمعته بحرقة
راضيين بدقة وعيش مع الكافيار
ولم شمل الشاب ع الشابة!!!!
م الأوله آآآآه
والتانية آآآآه
والتالتة آآآآه... وزيد حبة!!!!