عيل بياخد غرض
من لعبته... ويدش... !!
عيط وشاف دمعته
ع الخد مالية الوش... !!
صرخ وجات والدته
تسكته... ماسكتش... !!
ومكر أبوه... سكته
لما عطاله القرش... !!
كبر شوية الولد
إستدعى أبوه إبليس... !!
مستنى منه المدد
ف حكاية التوريث... !!
إبليس اخدها... وزعل
وقاله ليه يا خبيث... !!
هو انت ناقص مدد
ولا الأمور... تدبيس... ؟!!
هو اللى ورط بلد
تلاتين سنة يغلب... ؟!!
وجنبه اجعص دول
من دورتين وإقلب؟!!
إبليس وقف ع الملأ
وقاله مش هالعب
إبليس خلاص إعتزل
وساب لكوا الملعب... !!
كبرت ف راس الولد
قال يشترى... الدولة... !!
اخد فلوس بالعبط
ف عمولة... ومقاولة... !!
قامت عليه البلد
والشعب خاد جولة... !!
طلع براءة الولد
وإحنا... بلا... حولة... !!
حظ العوالم كده
يدى بدون ما يبص... !!
وبييجى بالفرهدة
وياخد شقاهم... لص... !!
تموت... وتقنى شريط
اهبل ييجى... يقص... !!
واخرة التنطيط
قالوا القانون بينص... !!