وجدي على موتٍ ترك هم وجروح
اليا طرى تفتّقن له جروحي
قلبٍ على قلبي وقطعة من الروح
في المقبرة ليت المقابر فتوحي
وأقول يا يمه عسى قبرك فسوح
وسط الرمال المسك منه يفوحي
ودي ازور القبر والود مفضوح
ميره حداني بالملاقى شحوحي
حالف لازورك ما لاحد فيني صلوح
من ذا الذي يقوى فراقٍ ذبوحي
يمكن أزورك من على الشوق واروح
واندى على قبر الغضيّ السموحي
ويمكن أزورك بالكفن حمل مذبوح
ذابحني فقدٍ منه قلبي ينوحي
جتني بحلمي تمسح بقلب مجروح
تقول يصبركم رفيع الصروحي
جعل النسيم اللي بها القلب ذابوح
تنبق دلايق زهر طوله يلوحي
ليت القبر من طيّب العود والفوح
وليت الذي بالقبر يشعر ويوحي
ودي اسلم من ورا سور وصروح
قد شفت باسٍ هل قلبه طروحي
ودي اسلم من على قاصي الدوح
لعلها تشوي كسوري وبوحي
خلوني أسير بلا غبن وطروح
انخى الذي عالِم بضيق البروحي
يمكن ليا سيّرت تغشاني مروح
ماغير احيّي لجل تهنى مروحي
مير الذي قد هوّن الحزن والنوح
عقلي ليا خدره بدا به يشوحي
يا كيف اخبي نظرة وصوت مبحوح
وسط الحشا حزني عليها فضوحي
جايز يكون بعيني الحزن مفتوح
أو جاز يظهر بين طبعي وبحوحي
يا وجد عيني جنتي ما بها شروح
ما أقول غير الدمع وافي شروحي
يمه بعيني دمع وإحساس وجموح
هب يتخطفني المهار الجموحي
أنا على أمي طيب القلب ولحوح
وحرٍ على الطالات قلبه طموحي
ما كنت ادري بالوجع صار مطروح
ويدق بعروقي عنيد ولحوحي
من يكشف اللي ساتره ضحك ومزوح
اليا حزن ظنوا ونينه مزوحي
والله لو أن الكون بيّن ومصلوح
ما غادر اللي له وجيهٍ صبوحي
باللحظة اللي ودعت هز طاروح
هز الثبات وهز فيني فروحي
أشوفها بالحلم تضحك لي وتلوح
يا جعل بيت الحمد أجر لتروحي
تمسح على راسي من الحب وتروح
طالبك لا تروحين وتروح روحي
وأصحى وقلبي ماليه خوف وصدوح
ويبح صوتي من حنينٍ صدوحي
عز الله أن الحلم ثلجٍ على قروح
وعز الله أنه جمر يكوي قروحي