العيد ف عين عيل
لا إشتال... ولا شيل
بيعد ف فلوسه...
عمال بيتخيل... !!
راح يشترى مسدس
راح يركب المراجيح
وفلوسه زى الريح
وعمرها قليل... !!
العيد كمان عيل
بنوتة بتميل
على خده بتبوسه... !!
يفتح لها إيدها
زود لها عيدها... !!
وإيديه على خده
فرحان ومين قده... ؟!!
عمال بيتخيل... !!
لو أكدوا الرؤية
للتوتة والساقية
وقناية بتزغرط
مش كف بيقرط
على تحفتين ف النيش
وكاسات بتشغلها
الفرحة مابتمشيش
عايزة اللى شاغلها
وقفاله ع الناصية
يا قلوبنا يا عاصية
ع الدمع والتهميش... !!
شريط ويبقى شاويش
ويبلغ العسكر
العيد حلف مايجيش
على سجن... ف معسكر
ولا محكمة تفتيش... !!